La luna, nasesta e piturada
de ‘n gial calt e apassionà,
la ne à de bota desmisià.
Pasada drio la zima pì lontana
la é ‘rivada calando su la piana
par mostrar quel gial in filigrana
che ghe fea da colar e da bandana.
Ades, la vaga sgionfa par la val
come che fusse an gran feral,
con ‘na luce fonda e granda
la vien dentro da ‘na falda
de quel cuert che ò qua tacà,
intant che speteé sul sofà.
Ceta, senza tant bacan
l’à fat baiar sol doi can
e spandest al so color
su tuti quei che zerca amor.
Sta not la é granda, la é maestosa,
no la é mai stata così tant radiosa
e, ghe donte, anca an cin insidiosa:
l’à fat rebaltar intimele e cuerte
prima de scampar drio le erte
de quel col che par distante,
ma la se à già sgoba in te ‘n istante.
La se à inveze smorzà pian pian
co ghe avon fat an batiman,
e po’ la se à negà in medo al mar,
forse straca del so tant vagabondar.
L’à assà spazio an zercio grant
che la varda ades da lontan:
l’é al sol ancora indormenzà
che tra an poch al se impinzerà.
Manca poche ore par finir l’amor,
ma l’é già chi che la domanda e la ól.
Ste in pase: “sta not la catè ancora là,
tacada su ‘n ninziol de blu e lillà.”
Fabio Bristot – Rufus
Foto: T.L. Fain
